നേർത്ത വിചാരം

സെക്കൻഡ് ഷോയ്ക്ക് ശേഷം
ഉറക്കം വരണോ അതോ
വരണ്ടയോ എന്ന മട്ടിൽ 
ശങ്കിച്ച് ശങ്കിച്ച്
കിടയ്ക്കരികിലൂടെ
വട്ടമിടുന്നു

വട്ടമിട്ടതാണെന്നൊന്നും തീർത്ത്
പറയാൻ പറ്റില്ല
ചിലപ്പോൾ നീളത്തിലും
ചതുരത്തിലും ഒക്കെയാവമല്ലോ
എന്നൊരുപമ ചുറ്റി പറ്റി
നില്പുണ്ടായിരുന്നു

എന്തോ അനങ്ങിയോ?
ഉപയാണോ അതോ
ഉറക്കമാണോ
അതോ വല്ല പെരുച്ചാഴിയോ
മറ്റോ...
അല്ല പറയാൻ പറ്റില്ല,
കേരളമല്ലെ
സംശയിക്കാൻ
യക്ഷിയൊന്നും
ഈ വഴി വരത്തേയില്ല.

ഒരു കുഞ്ഞു കരച്ചിൽ കേൾക്കുന്നുണ്ട്
ഏതെങ്കിലും അച്ഛന്‌ മദം പൊട്ടിയോ ദൈവേ
അല്ല പറയാനും വയ്യ പറയാതിരിക്കാനും വയ്യ

എന്തായിരിക്കാം കേട്ട ഒച്ച
എന്നാലോചിക്കുന്നതിന്റെ
ഒച്ച തലയിൽ കേട്ടുതുടങ്ങി
ഒരു പാലമിട്ടാൽ എങ്ങോട്ടും
പോകാമല്ലൊ
വേണമെങ്കിൽ
ഒത്ത നടുക്കെത്തുമ്പോൾ
ചാടുകയും ആകാം

വീണ്ടും ഒച്ചകേട്ടു
ഉറപ്പായ് എന്തോ ഉണ്ട്
ഈ ചെറിയ മുറിയിൽ
എന്താവും
രാത്രിയെ കബളിപ്പിക്കാൻ
അല്ല എന്നെ പറ്റിച്ചിട്ട്
എനിക്ക് പോലും
ഒന്നും നേടാനില്ലാത്ത സ്ഥിതിക്ക്
പറ്റിക്കാനും ആരെങ്കിലുമൊക്കെ വേണ്ടെ
രാത്രിയാവുമ്പോ
വല്ല്യ പുള്ള്യല്ലെ
എല്ലായിടത്തും
അറിയപെടുന്നയാൾ

ഇക്കാലത്ത് പേടിപ്പിക്കണമെങ്കിൽ
വെല്ല്യാൾക്കാരെത്തന്നെ വേണമല്ലൊ
അപ്പോൾ
പ്രിയപ്പെട്ട രാത്രി
പേടിക്കാൻ തയ്യാറായിക്കൊള്ളു
ഞാനും ഈ കേട്ട ഒച്ചയും കൂടി
നിന്നെ
പേടിപ്പിക്കാൻ പോകുവാണ്‌.
ഒരാൾ കളിക്കുമ്പോൾ
ആവേശം കൂട്ടുന്ന മറ്റൊരാളുണ്ടാവുമല്ലൊ
ഞാൻ ആറോളിലാണെ
അപ്പോ നീ പേടിക്കാൻ തയ്യാറെടുത്തൊ
എന്നു പറഞ്ഞു തീർന്നതും
വീണ്ടും ആകാശത്തെ നടുക്കി
ഭൂമിയെ വിറപ്പിച്ചു
ജലത്തെ പ്രളയമാക്കി
ഒരു ഭീമാകാരമായ ഒച്ഛ
പേടിച്ചുകാണും ..
രാത്രി പേടിച്ചുകാണും
ആരെങ്കിലും സൂര്യനെയും കൊണ്ട്
കള്ളപണിയിൽ ഏർപ്പെട്ടിരിക്കുന്നവരെ
റെയ്ഡ് ചെയ്യാൻ വന്നതാവും
ശ്ശൊ ആശങ്കകളങ്ങനെ ആകാശം മുട്ടെ
തൂങ്ങി നിന്ന് മടുത്ത
ഒരു
എട്ടുകാലി ജഡം
താഴെക്കു വീണതായിരുന്നു.
.===========================