സ്പെഷ്യൽ ക്ളാസ്

മരങ്ങളുണ്ടായിരുന്ന നാളുകൾ
മഞ്ഞു പെയ്തു 
മഴപെയ്തു
ഉർവ്വരയായ
ഒരു കാലത്തെ
അനന്തമായ മൗനത്തിലൂടെ
മരുഭൂമി
ഓർമ്മിച്ചെടുക്കുയായിർന്നു


കാട് കരഞ്ഞു
വിളിച്ചുകൊണ്ടിരുന്നു
ഇറുത്തുമാറ്റി
നാടേറിപോകുന്ന
ശരീരത്തെയോർത്ത്

മല മിഴിപൂട്ടി നിന്നു
കുഴിച്ചെടുത്തു
കുന്നുകൂട്ടി
തലയാട്ടി പോവുന്ന
ടിപ്പറുകളെ നോക്കി

നദി താണുതൊഴുതു
താഴ്ത്തിക്കോരി
നീട്ടിപാടി
മണൽ
വള്ളത്തിലേറി
പോലിസ് കാവലിൽ
മാഞ്ഞു

ഗ്രാമം മൂക്കു പൊത്തി
നഗരം ഇടയ്ക്കിടെ
തൂറുന്ന വീപ്പകുറ്റികളെ
വിസർജ്ജിക്കുന്നത്
അറപ്പോടെ നോക്കി

നഗരത്തിനുമാത്രം
ഒന്നിനും നേരമില്ലെന്നെ
ഓട്ടത്തോടെ ഓട്ടം
കാട് വെട്ടണം
മലതുരക്കണം
മരമെരിക്കണം


എന്നെങ്കിലും ഒരു മഴ
ഇല്ലെങ്കിൽ പുഴ
വഴി തെറ്റി വന്നാലോ
അതേ നഗരം
മരുഭൂമിക്കു പഠിക്കുവാണ്‌.